مودېل ئۇيغۇرچىنى ئاز كۆرگەن. شۇڭا قىسقا، ئېنىقسىز ئۇيغۇرچە تەلەپ كۆپىنچە ئىككى خىل جاۋاب بېرىدۇ: تۈركچە ياكى ئۆزبەكچىگە يېقىن بىر تىل، ياكى سىلىق ئەمما خاتا ئۇيغۇرچە. بۇ بەت شۇنى تۈزىتىشنىڭ يېزىش قائىدىسى.
ئۇيغۇرچە تەلەپ قانداق يېزىلىدۇ
تۆۋەن مەنبەلىك تىل مەسىلىسى — نېمىشقا ئۇيغۇرچە ناچار چىقىدۇ — ئايرىم يېزىلغان. بۇ يەردە سەۋەب قايتىلانمايدۇ. پەقەت ئىككى ئىش: تەلەپنى قانداق يېزىش، ۋە جاۋابنى قانداق تەكشۈرۈش.
بىر تەلەپتە ئۈچ نەرسە بولسۇن
ۋەزىپە. نېمە قىلسۇن: تەرجىمە، قىسقارتىش، ياكى بىر سوئالغا جاۋاب. «ھەممىنى ياخشى قىل» دېگەن ۋەزىپە ئەمەس.
تىل. جاۋاب ئۇيغۇرچە، ئەرەب يېزىقىدا بولسۇن. لاتىن يېزىقى، تۈركچە ياكى ئۆزبەكچە بولمىسۇن. بۇنى ئاتاپ يېزىڭ. مودېل ئۆزى پەرەز قىلمايدۇ.
شەكىل. بىر قىسقا مىسال، ياكى ئۇزۇنلۇق. «قىسقا» دېگەندىن «ئۈچ جۈملە» ياخشى. مىسال كۆرسەتمە سۆزدىن كۈچلۈك، چۈنكى مودېل كېيىنكى بەلگىنى شۇ شەكىلگە يېقىن تاللايدۇ.
ئاجىز تەلەپ، ئاندىن تۈزەتكىنى
ئاجىز:
بۇنى ئۇيغۇرچە ياخشى قىلىپ ياز.
تۈزەتكەن:
تۆۋەندىكى ئىنگلىزچە جۈملىنى ئۇيغۇرچىگە تەرجىمە قىل.
جاۋاب پەقەت ئۇيغۇر ئەرەب يېزىقىدا بولسۇن.
تۈركچە، ئۆزبەكچە ۋە لاتىن يېزىقى بولمىسۇن.
ئاتالغۇنى تۇنجى قېتىم قوش ياز: سىڭدۈرۈش (embedding).
ئۈچ جۈملىدىن ئاشمىسۇن.
مىسال شەكىل:
كىرگۈزۈش: The model predicts the next token.
چىقىرىش: مودېل كېيىنكى بەلگىنى (token) مۆلچەرلەيدۇ.ئىنگلىزچە ئاتالغۇنى تاشلىماڭ
تۇنجى قېتىم ئاتالغۇنى ئىككىلىسى بىلەن يېزىڭ: سىڭدۈرۈش (embedding). كېيىنكى قېتىم ئۇيغۇرچىسى يېتەرلىك. ئىنگلىزچىنى پۈتۈنلەي ئۆچۈرمەڭ. كود، خاتالىق ئۇچۇرى ۋە ھۆججەت ئىنگلىزچە. ئوقۇغۇچى embedding نى كۆرمىسە، ھۆججەتتىن ئىزدىيەلمەيدۇ.
تەرجىمە قىلىنماسلىقى كېرەكلىرى: مودېل نامى، API، ھۆججەت نامى، كود پارچىسى. تەرجىمە قىلىنغىنى: چۈشەندۈرۈش، مىسال ۋە خۇلاسە. بىر ماقالىدە بىر ئاتالغۇنىڭ بىر خىل قارشىلىقى بولسۇن. ئوتتۇرىدا باشقا سۆزگە ئالماشتۇرۇۋەتمەڭ.
جاۋابنى قانداق تەكشۈرىسىز
سىلىق ئۇيغۇرچە ھەقىقەت ئەمەس. مودېل كېيىنكى بەلگىنى تاللايدۇ، توغرىلىقنى ئايرىم تەكشۈرمەيدۇ. تەكشۈرۈش سىزدىن. ئالاھىدە تۆت نۇقتا:
سان، چېسلا، ئىسىم ۋە كىتاب نامىنى مەنبەسىز قوبۇل قىلماڭ. ئۇلار ئەڭ ئاسان ئويدۇرۇلىدىغان بەلگە.
مودېل نەقىل كەلتۈرسە، شۇ جۈملىنى ئەسلى تېكىستتىن ئىزدەڭ. تاپالمىسىڭىز، نەقىل يوق. مودېل «مەنبە» شەكلىنىلا داۋاملاشتۇرغان.
جاۋاب بەك تولۇق ۋە بەك سىلىق بولسا، بىر كونكرېت سوئال قايتۇرۇڭ: «بۇ سان قايسى جۈملىدىن كەلدى؟» جاۋاب بېرەلمىسە، ساننى ئۆچۈرۈڭ.
ئىملا تۈزۈك بولسىمۇ مەزمۇن خاتا بولۇشى مۇمكىن. تىل تەكشۈرۈش ھەقىقەت تەكشۈرۈشنىڭ ئورنىنى باسمايدۇ.
قاچان كۆرسەتمىنى ئىنگلىزچە يېزىش
كۆرسەتمىنى ئىنگلىزچە، مەزمۇننى ئۇيغۇرچە قويسىڭىزمۇ بولىدۇ. مودېل قىسقا ئىنگلىزچە بۇيرۇقنى ئاسانراق ئەگىشىدۇ. جاۋاب تىلىنى يەنىلا ئاتاپ يېزىڭ، بولمىسا ئىنگلىزچە داۋاملاشتۇرىدۇ.
Translate the Uyghur text into clear English.
Keep personal names unchanged.
If a word is unclear, write [unclear] instead of guessing.
Text:
«بۇ يەرگە ئۇيغۇرچە مەزمۇن»| قىلىڭ | قىلماڭ |
|---|---|
| جاۋاب تىلىنى ئاتاپ يېزىڭ | «ياخشى قىلىپ ياز» دەپ قويۇڭ |
| بىر قىسقا مىسال بېرىڭ | بەش ۋەزىپىنى بىر تەلەپكە قاچىلاڭ |
| ئاتالغۇنى تۇنجى قېتىم قوش يېزىڭ: سىڭدۈرۈش (embedding) | embedding نى پەقەت تەرجىمە قىلىپ تاشلاڭ |
| سان ۋە نەقىلنى مەنبەدىن تەكشۈرۈڭ | سىلىق جۈملىنى ھەقىقەت دەپ ئېلىڭ |
داۋاملىق ئوقۇڭ
ئۇيغۇر تىلى ۋە تۆۋەن مەنبەلىك تىل مەسىلىسى: https://www.idirak.com/articles/uyghur-nlp-low-resource
مودېل قانداق جاۋاب بېرىدۇ: https://www.idirak.com/articles/how-a-language-model-answers
تەلەپ يېزىش: https://www.idirak.com/articles/prompt-engineering
ئۇيغۇرچە AI ئاتالغۇلار لۇغىتى: https://www.idirak.com/articles/uyghur-ai-glossary
تۈزگۈچى: سۈنئىي ئىدراك — idirak.com ئۈچۈن، ئۇيغۇرچە تەلەپ يېزىش